1. فكرة المشروع :

الفكرة بسيطة, هو أنك غادي تبيع خضرة مغسولة, مقطعة أو مجمدة فأكياس بلاستيكية بثمن جد مناسب للموظفين باش تختاصر عليهم فالوقت و المجهود!

إيجابيات الفكرة :

• تقدر تبداها برأس مال صغير
• هاد الخضرة ماغاديش تخسر ليك حيتاش غادي تحطها فالفريݣو
• تقدر تبيع بثمن زوين لأنك غادي تشري خضرة بجودة منخفضة فسوق الجملة
• الموظفين غادي يديرو معك إشتراك شهري
• غادي تجيب الطلبيات من الإنترنيت
• غادي تخدم فمدينتك كلها
• تقدر تخدم مع الطلبة الجامعيين من بعد

2. دراسة السوق :

مُلاحظة المُشكل :

إلا كنتي كاتعرف شي موظف (ة), غادي تلاحظ بلي ماكايكونش عندو الوقت,

أصلاً الموظف خدمتو هي يبيع الوقت ديالو مُقابل صالير.

هادي من جهة…

من جهة أخرى, كاتلقاهم عياو من ماكلة الزنقة حيتاش كاتقام عليهم غالية أو حيتاش صعيب يداومو عليها لأنها كاتڭهم أو تقدر تسبب ليهم فأمراض.

أنا شخصيا كايبان ليا بلي أصل المُشكل هو أن المُوظف كايفظل يتزوج بمُوظفة لي غاتقدر تعاونو باش يخلص طريطات ديالو عوض مايتزوج بمرأة الدار لي تكلّف بالطياب, الشقا إلخ… هادا كايبقا رأيي, نقدر نكون غالط!

ماعليناش…

المهم هو أنه كاين مشكل ديال الماكلة عند الموظفين فالمغرب, أو الأغلبية ماعندوش إستطاعة باش يوظف طباخة فالمنزل,

كاينة واحد الفئة لي كاتعامل مع طباخة كاتوجد ماكلة ديال يومين أولا ثلاثة… هاد الفئة قليلة بحُكم عامل الثقة.

نسبة الطَلَب :

البلان لي زوين فهاد الفكرة هي أنها متوافقة مع الحاجيات الأساسية ديال بنادم…

إلا جينا نشوفو لـ Pyramid ديال Maslow,

كانلقاو بلي الماكلة كاينة فـ La Base ديال لـ Pyramid مع Physiological Needs.

بصيغة أخرى…

ما غاديش تبيع شي حاجة لي هي ” فوق من الشبعة”

حنا غادي نبيعو منتوج لواحد الفئة لي عندها مشكل ديال الوقت ماكاينش, أو ماباغياش تضيع المجهود ديالها فشي حاجة لي ماكاين لاش منها ( تنقية ديال الخضرة أو تقطاع ديالها )

قادية أخرى مهمة : هي أن الموضفين كايعانيو مع غلاء أسعار الخضرة لي ماكادورش عليها سيمانة أو كاتخسر.

فهمتي القالب أولا مازال؟

3. لبلان ديال المشروع :

أي مشروع كانبغي نبداه, ضاروري كان دير ليه بلان ديالو خاص بيه…

أو غاليبان كانتبع واحد لـ Framework سميتها لـ 4 P’s

• Product
• Pricing
• Promotion
• Placement

1. لـ P لولانيا هي المنتوج :

دابا أجي نراجعو المعطيات لي عندنا :

1. الفئة المستهدفة : الموظفين المغاربة
2. قلة الوقت لتحظير الأكل
3. ملل من الأكل ديال الزنقة
4. باغيين حل لي يكون بثمن رخيص أولي يختاصر عليهم فالوقت و المجهود

طاح الحُك أو صاب غطاه!

هنا فين كايجي الدور ديال المنتوج لي غادي نبيعو,

خضرة غادي نشريوها حنا من سوق الجملة أو غادي نشريوها Deuxième Qualité باش تقام علينا رخيصة أو حيتاش حنا أصلاً غادي نقيوها من الضرابي, يعني ماكاين لاش نشري خضرة راس السوق ( نخليو الخضارة هوما لي يشريوها )

من بعدما غادي نشريوها أ سيدي/ أ لالة,

غادي نجيبوها لدار عندنا أو غادي نغسلوها مزيان أو غادي نقيوها أو نقشروها باش من بعد نقطعوها.

تقدر تبدا غير ب 5 كيلو مخلطة, أو شوية بشوية تقدر تكبر المشروع ديالك…مالك فين زربان؟

إوا من بعد غادي نجيبو شي ميزان صغير أو نجيبو أكياس بلاستيكية باش نجمعو فيها التخليطة ديال الخضرة ديالنا أولا إلا بغيتي تقدر دير كل نوع خضرة فكيس بلاستيكي ديالها, لي عجبك…

من بعد حط كولشي فالفريݣو ديالك.

ها هو المنتوج ديالك واجد!

2. لـ P تانية هي الثمن :

الربح كاين عندك فالشرا,

أو بما أنك غادي تشري خضرة Deuxième Qualité,

تقدر تبيع بالرخا,

أو السلعة ديالك ماغاديش تخسر,

أو الزوينة هي أن الموضفين إقدرو إديرو معك إشتراك شهري!

فهاد المرحلة غادي يخسك تظبط الحساب ديالك بالسنتيم, أو غادي يخسك تاخد بعين الإعتبار جميع المصاريف باش تقدر تحسب ما يسمى بالـ C.O.G.S , إختصار ديال Cost Of Goods Sold.

هنا الثمن غادي يختالف من شخص لآخر,

كل واحد على قد شطارتو و القيمة المضافة ديالو!

3. لـ P الثالثة هي التسويق :

فهاد المرحلة الغرض ديالك هو تلقا أحسن طريقة لي غادي دير بيها التسويق لهاد الفكرة باش تشوف واش قدرتي تكراكي ليها الكود أولا لا!

حيتاش الفكرة خدامة,

كيفاش غادي تطبقها هي فاش كاين القالب.

بالنسبة لتسويق لهاد المشروع غادي يكون تسويق إلكتروني بإستعمال مواقع التواصل الإجتماعي!

أو أحسن طريقة ديال التسويق فمواقع التواصل الإجتماعي اليوم هي عن طريق ما يسمى بـ Demonstration

باش تبيع واحد الفكرة غادي يخسك دير ليها Démonstration…

حاول دير فيديو لي غادي توثق فيه المراحل لي تبعتي باش توصل للمنتوج النهائي : خضرة, مغسولة, منقية, مقطعة أو مجمدة!

من سوق الجملة, للكوزينة عندك فين غادي تغسل الخضرة, تنقيها من الضرابي, تقشرها, تقطعها, تعبرها فالميزان باش من بعد تحطها فأكياس بلاستيكية باش تدخل للفريݣو.

ملي تصور هاد الفيديو لي غادي يكون بالـ Format ديال Reel…

لوحو لمواقع التواصل الإجتماعي, باش من بعد تقدر تطلق بيه إشهار لي غادي تستهدف بيه ” الموضفين فمدينتك “.

كاينة حواج أخرى تقدر تاخدها بعين الإعتبار فهاد المرحلة باش تزيد من القيمة المضافة ديال هاد المشروع…

بحال لـ Packaging,

شوف هاد الشكل :

أولا هاد الشكل :

4. لـ P الرابعة هي الموقع :

فاللول ديال المشروع ماغاديش تحتاش لموقع لأنك غادي تخدم بـ Système ديال الطلبيات كايجيو عن طريق الإنترنيت زائد التوصيل حتال لباب الدار.

ولكن…

من بعد, كانصحك باش دير طلب للمبادرة الوطنية باش تاخد دعم لي غادي يعاونك باش:

• تقاد شركة ديالك
• تكري محل صغير فموقع قريب من السكن الجامعي
• تشري فريݣوات
• تقاد ماركة مسجلة ديالك
• تقدر تدخل لأسواق داخلية بمنتوج محلي ديالك أولا لأسواق خارجية

المهم…

The Sky Is The Limit

إلا عندك شي سؤال تقدر تطرحو فالتعاليق لتحت حيتاش غادي نجاوب عليهم.

أو إلا بان ليك بلي هاد القالب يقدر يعاون شي حد كاتعرفو, بارتاجيه معاه!