فكرة المشروع :
الخِدمة لي غادي تقدم هي أنك غادي تعاون أصحاب الشركات القدام أو الجداد باش يختارو أحسن موقع فين يقدرو يفتحو المحل التجاري ديالهم, بحال مدرسة, قهوة, مخبزة,إلخ…
هاد السيرفيس هو عبارة عن إستشارة بمُقابل مادي, لي غادي تقدم فيه لأصحاب الشركات واحد الدراسة ديال المنافسة فالحي/ فالمدينة, دراسة للعرض و الطلب و توصية بإختيار محل معين للكراء أو لشراء.
ملاحظة: باش هاد القَالب ينجح, خسك تكون مخالط مزيان فمدينتك, تقدر تستاعن بالذكاء الإصطناعي و Google Maps باش يعاونوك دير دراسة معمقة لمنطقة معينة!
إيجابيات الفكرة :
- تقدر تبداها بدون رأس مال
- الطلب على الخدمة موجود
- المنافسة قليلة أو شبه مُنعدمة
- تقدر تحولها لـ Web App
الربح :
بما أنك غادي تبيع إستشارة, الهامش ديال الربح عندك غادي يكون كبير!
ثمن الإستشارة كايلعب بين 1,000 درهم حتال 50,000 درهم, على حسب حجم الشركة أو نوع النشاط التجاري ديالها.
علاش هاد الفكرة خدامة؟
حيتاش أصحاب الشركات عارفين بلي الموقع ديال المحل التجاري ديالهم, كايمثل 80% من نجاح المشروع!
كولشي على الموقع, الموقع, الموقع…
كيفاش تقدر تبدا هاد المشروع؟
باش مانطولش عليك بالتفاصيل…
القالب ديال هاد المشروع كاين فواحد الحاجة…
إلا قدرتي تكراكي ليها الكود, عرف بلي هاد المشروع غادي ينجح ليك,
هاد الحاجة هي : خاص أصحاب الشركات فمدينتك يعرفو بلي نتا هو أحسن واحد كايعرف يلقا أحسن موقع لشركة معينة فمدينة معينة!
صافي…
كانصحك إلا بغيتي تبدا هاد المشروع باش تقاد صفحة محترفة على منصات التواصل الإجتماعي و منصة Linkedin . تقدر تسمي الصفحة ديالك مثلاً Emplacement Entreprise Casablanca
الغرض ديالك من هاد الصفحات, هو أنك تبيّن الخبرة ديالك!
تقدر تشارك فيديوهات كاتشرح فيهم علاش واحد الشركة خدامة أو علاش ماخداماش فشي موقع معين,
أولا تقدر توري شي موقع أو تقول لينا شنو هو أحسن نشاط تجاري إقدر إخدم فيها مزيان…
المهم,
The Sky Is The Limit
إلا عندك شي سؤال تقدر تطرحو فالتعاليق لتحت حيتاش غادي نجاوب عليهم.
أو إلا بان ليك بلي هاد القالب يقدر يعاون شي حد كاتعرفو, بارتاجيه معاه!
